MohTheNorgard

كان نفسي اعيش في العصور التاريخيه القديمه اللي كان الناس حلمها انها تعمل شئ يخليها خالده مدي الحياه مش مجرد اني اجمع فلوس واضمن مستقبل وانسي ان الحياه عباره عن ممر للاخره كان نفسي اعيش بعيد في عصر قبل السوشيال ميديا والنفاق وانفصام الشخصيه والامراض النفسيه اللي بنشوفها اليومين دول، كان نفسي وقت ماحب حد اعمل المستحيل علشانه ويبقي في شغف واشتياق وجوبات مش مجرد حاجه سهله اني ابدء علاقه مع اي حد وانهيها في شات حتي لو بينا مسافات الدنيا كان نفسي الكلام يتقال بالعيون والاشتياق والحب يتحس في لمسه ايد كان نفسي اعمل زيي مالناس كانت بتعمل في عصور ماقبل الشمس وكانت بتسافر وبتقطع بحور وجبال في انتظار الشخص اللي بتحبه، انا بحب اقرا رسايل كافكا لميلينا علشان كان بيحكيلها كل تفاصيل حياته كان بيحكيلها انه مشتاق ليها بكل الطرق افتكر ان كافكا ده لو كان عايش بينا دلوقتي كان ابوه دخله خدمه اجتماعيه وطلعه موظف وكان هايكلم ميلينا عن طريق الواتس اب ومكانش هايتجوزها كان هايسيبها متجوزه ويخليها تخون جوزها معاه ويسرق فلوسها ، كان ديستوفيسكي هايبقي في مستشفي ابو الريش او في معتقل من معتقلات السيسي، كان البير كامو سافر وهجر وراح تركيا بتهمه الانضمام لجماعه ارهابيه، كان فرويد شغال اخصائي اجتماعي في مدرسه، قد ايه حاجه بسيطه جدا اصغر من كف الايد اسمها تليفون او موبايل جعلت من اي بني ادم شئ رخيص سهل جدا توصله مش لازم تتعب وتسافر وتشتاق وتحس وتحتاج لانه كده كده بين ايديك وكمان كترت جدا من الامراض النفسيه وخلت كل واحد يفكر ويشك ويبعد ويحاول يصغر في الدايره لحد لما هايكون فيها لوحده